Cocuq Mərcanlı kəndində məcburi köçkün uşaqlar üçün tədbir təşkil edilmişdir

“İnci” Məcburi Köçkün Qadınlar İctimai Birliyi Azərbaycan Respublikasının Prezidenti yanında Qeyri-Hökümət Təşkilatlarına Dövlət Dəstəyi Şurasının dəstəyi ilə “Cəbhə bölgəsində yaşayan məcburi köçkün uşaq və yeniyetmələrin sosial inteqrasiyası məqsədilə yay məktəbinin təşkili” layihəsini həyata keçirir.

Layihənin əsas məqsədini cəbhəyanı bölgələrdə yaşayan uşaq və yeniyetmələrin ictimai fəallığını artırmaq, asudə vaxtının səmərəli təşkili ilə sosial inteqrasiyası və təhsilə marağıni təbliğ etmək təşkil edir.

Layihə çərçivəsində növbəti seminar “Sosial fəaliyyət və effektiv komunikasiya” mövzusunda Cəbrayıl rayon Cocuq Mərcanlı kəndində uşaqların və pedoqoji heyətin iştirakı ilə keçirilmişdir. Tədbirdən öncə təşkilatın əməkdaşları “Aprel şəhidlərinə xatirə” abidəsini ziyarət edib, Vətən uğrunda şəhid olanların xatirəsini ehtiramla anıblar.

Seminarı giriş sözü ilə açan şəhid Novruz Aslanov adına Cəbrayıl rayon Cocuq Mərcanlı kənd tam orta məktəbinin direktoru Zamin Həziyev açaraq həyata keçirilən layihənin əhəmiyyətini qeyd edərək, Cocuq Mərcanlıda belə layihənin həyata keçirilməsinin uşaq və yeniyetmələrin sosial inteqrasiyası, vətənpərvərlik tərbiyəsinin möhkəmləndirilməsi üçün böyük əhəmiyyət daşıdığını diqqətə çatdırıb, uşaqlar üçün faydalı olacağını qeyd etmişdir.

Layihə rəhbəri Jalə Teymurlu həyata keçirilən layihə, donor təşkilat barədə iştirakçılara məlumat verərək bildirmişdir ki, bu gün ölkəmizdə digər uşaqlarla yanaşı, aztəminatlı ailələrin, eyni zamanda qaçqın və məcburi köçkünlərin uşaqlarının təhsilinə və inkişafına ciddi diqqət yetirilir, respublikamızda uşaqların hərtərəfli inkişafı, hüquqlarının qorunmasıi ilə bağlı geniş tədbirlər həyata keçirilir. Cocuq Mərcanlı kəndində məktəbin fəaliyyətə başlamasının, uşaqların təlim və tədris prosesində rahat iştirakının burada dinc və firavan həyatın təmin edilməsinin bariz nümunəsi olduğunu bildirib. Bu gün məhz Cocuq Mərcanlıda məcburi köçkün uşaqları ilə görüşün keçirilməsi, fikir mübadiləsi aparılması cənab Prezident İlham Əliyevin yorulmaz və fədakar əməyinin nəticəsidir və bu istiqamətdə QHT-lərin də fəaliyyətlərinin davamlı olaraq həyata keçirilməsini zəruri edir.

Layihənin eksperti uşaqlara sosial fəaliyətlərin uşaqların inkişafında və gələcək karyerasında yeri, effektiv komunikasiya, uşaq hüquqları və uşaqların vəzifələri, sosial komunikasiya mövzusunda təqdimat etmişdir.

Seminar qarşılıqlı müzakirə şəklində davam etmiş, seminar iştirakçılarının suallarını cavablandırılmışdır. İştirakçılar belə maarifləndirici tədbirlərin keçirilməsinin zəruriliyini qeyd etmiş, Azərbaycan Respublikasının Prezidenti yanında QHT-lərə Dövlət Dəstəyi Şurası tərəfindən belə layihənin Lələtəpənin bir addımlığında yerləşən Cocuq Mərcanlıda məcburi köçkün uşaq və yeniyetmələrinin iştirakılə icra olunmasına dəstək göstərdiyinə görə minnətdarlıqlarını ifadə etmişlər.

Layihə çərçivəsində iyul ayında 30 məcburi köçkün uşaq və yeniyetmələrin iştirakı ilə Göygöl rayonunda keçiriləcək 3 günlük Yay məktəbi haqqında da məlumat verilmiş və yay məktəbində əsas iştirakçıların məhz Cocuq Mərcanlı uşaqlarının yer alacağı bildirilmiş və bununla bağlı müraciət qaydaları və seçim prossesi də müzakirə edilmişdir.

Tədbirin sonunda “İnci” Məcburi Köçkün Qadınlar İctimai Birliyi tərəfindən məktəbə Azərbaycanın bayrağı və digər hədiyyələr təqdim edilib. Müəllim və şagird kollektivi ilə birgə xatirə şəkli çəkdirilib.

“İnci” məcburi köçkün qadınlar İctimai Birliyinin İnformasiya departamenti.