Aprel döyüşləri şəhidlərinin xatirəsinin əbədiləşdirilməsi ilə bağlı İsmayıllı rayonunda tədbir təşkil edilmişdir

“Beyləqan Gənclərinin Maarifləndirilməsi və Sosial İnkişafı” İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi ilə “Aprel döyüşləri şəhidlərinin xatirəsinin əbədiləşdirilməsi ilə bağlı yeniyetmə və gənclər arasında tədbirlərin təşkili” layihəsini həyata keçirir. Layihənin əsas məqsədini 2016- ci ilin aprel döyüşlərində qəhrəmanlıqla şəhid olmuş əsgər, gizir və zabitlərin qəhrəmanlığının təbliği və xatirələrinin əbədiləşdirilməsi və bununla bağlı maarifləndirmə işinin aparılması təşkil edir.

Layihə çərçivəsində 20 oktybar 2017- ci il saat 11:00-da İsmayıllı rayonunda aprel döyüşlərində həlak olan Şəhid Vahabzadə Mikayıl Yaqub oğlunun əziz xatirəsinə “Aprel döyüşləri qələbəmizin carçısı və qəhrəmanlıq səlnaməsidir” adlı tədbir təşkil edilmişdirdir.

Tədbirdə İsmayıllı rayon İcra Hakimiyyətinin, Gənclər və İdman İdarəsinin, Qarabağ müharibəsi veteranları və şəhid ailələri, Yazıçılar Birliyinin üzvləri, şəhidlərin ailə üzvləri, şəhidin təhsil aldığı Maçaxı kənd orta məktəbinin müəllim və şagirdləri, ictimai fəal gənclər və dövlət orqanlarının nümayəndələri iştirak etmişlər. Tədbirdən öncə şəhidin qəbirüstü abidəsinə səfər edilmişdir.

Tədbirdə müxtəlif çıxışlar, şair və yazıçıların vətənpərvərlik ruhunda yazdığı şeir və əsərlərdən parçalar, yeniyetmə və gənclərin hazırladığı kompozisiyalar və Aprel döyüşlərinə həsr olunmuş sənədli film iştirakçılara təqdim edilmişdir.