Aprel döyüşləri şəhidlərinin xatirəsinin əbədiləşdirilməsi ilə bağlı Beyləqan rayonunda tədbir təşkil edilmişdir

“Beyləqan Gənclərinin Maarifləndirilməsi və Sosial İnkişafı” İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi ilə “Aprel döyüşləri şəhidlərinin xatirəsinin əbədiləşdirilməsi ilə bağlı yeniyetmə və gənclər arasında tədbirlərin təşkili” layihəsini həyata keçirir. Layihənin əsas məqsədini 2016- ci ilin aprel döyüşlərində qəhrəmanlıqla şəhid olmuş əsgər, gizir və zabitlərin qəhrəmanlığının təbliği və xatirələrinin əbədiləşdirilməsi və bununla bağlı maarifləndirmə işinin aparılması təşkil edir.

Layihə çərçivəsində Beyləqan rayonundan olan aprel döyüşlərində həlak olan şəhidlərin əziz xatirəsinə həsr edilmiş “Aprel döyüşləri qələbəmizin carçısı və qəhrəmanlıq səlnaməsidir” adlı tədbir təşkil edilmişdir.

Tədbir şəhidlərin əziz xatirəsini bir dəqiqəlik sükutla yad edilməsi ilə öz işinə başladı. Tədbiri giriş sözü ilə açan təşkilatın sədri Zaur Quliyev öz çıxışında bildirdi ki, Aprel döyüşləri Azərbaycan ordusunun tarix yazdığı bir döyüşdür. Aprel döyüşləri Azərbaycan ordusu, Azərbaycan gəncliyi üçün bir imtahan oldu. Əgər aprel döyüşlərində Ermənistan ordusunun əsgərləri səngərdən qaçırdısa, döyüşə girməmək üçün müxtəlif bəhanələr gətirirdisə,nəinki Azərbacan ordusu, bütün Azərbaycan gəncliyi isə cəbhə bölgəsinə doğru axışırdı. Azərbaycan əsgəri isə döyüşə atılmağa, qəhrəmanlıq göstərməyə, torpaqlarımızı azad etməyə hazır olduğunu öz şücaəti ilə göstərirdi.

Tədbirdə Beyləqan rayonundan olan aprel şəhidlərinin oxuduğu təhsil müəssisəsinin, rayon İcra Hakimiyyətinin, Rayon Mədəniyyət və Turizm İdarəsinin əməkdaşları, Qarabağ müharibəsi veteranları, Azərbaycan Yazıçılar Birliyinin üzvləri, şəhidlərin ailə üzvləri, ictimai fəal gənclər və dövlət orqanlarının nümayəndələri çıxışlar etmiş, şair və yazıçılar vətənpərvərlik ruhunda yazdığı şeir və əsərlərdən parçalar söyləmişlər. Eyni zamanda yeniyetmə və gənclərin hazırladığı kompozisiyalar və Aprel döyüşlərinə həsr olunmuş sənədli film iştirakçıların böyük marağına səbəb olmuşdur.