Beyləqan Mədəniyyət Mərkəzində Azərbaycan Yazıçılar Birliyinin Beyləqan Bölməsinin təşkilatçılığı ilə tanınmış yazıçı-publisist, Şəfəq Nasirlə görüş keçirilmişdir

ŞƏFƏQ NASİRLƏ GÖRÜŞ

Bu gün Beyləqan Mədəniyyət Mərkəzində Azərbaycan Yazıçılar Birliyinin Beyləqan Bölməsinin təşkilatçılığı ilə tanınmış yazıçı-publisist, əslən Beyləqanlı olan Şəfəq Nasirlə oxucuların, rayon ictimaiyyətinin və bölmə üzvlərinin iştirakı ilə görüş keçirilmişdir. Görüşdə həmçinin, tanınmış şair Musa Ələkbərli, “Yada düşdü” jurnalının təsisçisi Nəzakət Məmmədli, jurnalist Təranə Məmmədova, müəllimlər və məktəblilər, eləcə də yerli ədəbiyyat həvəskarları iştirak edirdilər.

AYB-nin Beyləqan Bölməsinin sədri yazıçı Asif Cəfərli görüşü açıq elan etdi. Sonra məclisi idarə etmək üçün sözü Azad İstehlakçılar birliyinin sədri Mehman Əliyevə verdi. Mehman Əliyev Şəfəq Nasirin həyat və yaradıcılığı haqqında ətraflı məlumat verdi. Onun bədii yaradıcılığa şeirlə başladığını, sonra isə bir yazıçı kimi nəsrlə məşğul olduğunu və burada uğur qazandığını qeyd etdi.

Sonra şair Musa Ələkbərli Ş.Nasirlə "Azərnəşr"də bir yerdə işlədikləri vaxtla bağlı xatirələrini bölüşdü. Oxucuların xahişi ilə Musa müəllim bir neçə şeir oxudu. Şeirlər tədbir iştirakçıları tərəfindən rəğbətlə qarşılandı. Şairə Nəzakət Məmmədli yeni şeirlərini oxudu, ürək sözlərini söylədi. Sonra isə AYB üzvlərindən E.İsrafiloğlu, F.Hilaloğlu, R.Budaq, F.Əsəd, S.Beyləqanlı, ziyalılardan Ə.Hacıyev, Ə.Ziya, M.İsgəndərova və b. qonaq haqqında xoş sözlər söylədilər. Nəhayət, yazıçı Ş.Nasir söz aldı. O, Beyləqan torpağına bağlılığından, babası "Molla Nəsrəddin"çi, jurnalist Məmmədəli Nasirdən və nəsr yaradıcılığından, yeni yazacağı əsərlərdən oxuculara ətraflı məlumat verdi.

Daha sonra Azad İstehlakçılar İctimai Birliyinin Beyləqan Nümayəndəliyinin Ofis rəhbəri Qarayeva Şəbnəm, “Aytac Kompyuter kursu”nun rəhbəri Əliyeva Vəfa, Bakı Dövlət Universitetinin tələbəsi Qarayeva Kəmalə, II Aşıqlı kənd tam orta məktəbin IX sinif şagirdləri L.Əmirquliyeva, S.Əhmədzadə, şəhər 1 N-li məktəbin IX sinif şagirdləri N.Quliyeva, A.Məmmədzadə və b. yazıçıya suallar verdilər. Ş.Nasir Beyləqana gəlişindən, tədbirin keçirilməsindən xoşhal olduğunu qeyd etdi. Hamıya təşəkkürünü bildirdi.

Sonda Şəfəq Nasir, Musa Ələkbərli, Nəzakət Məmmədli, Təranə Məmmədova, Mehman Əliyev, Tahir Həsənov, Rövşən Budaq AYB-nin təsis etdiyi “Mücirəddin Beyləqani” diplomu ilə təltif olundular.

Məclisin aparıcısı Mehman Əliyev bütün iştirakçılara minnətdarlığını bildirdi.

Görüş maraqlı və işgüzar keçdi. Tədbirdə İctimai televiziyanın və mətbuat işçilərinin nümayəndələri də iştirak etdilər.

Arzu Rəhimov